Spiet, ze hef spiet. Hiel veule spiet. Spiet as haor’n op heur heufd. As de lange wilde donkere haorbos rond heur bolle blozende wang’n.
Waorum was ze noe zo preutsig west? ’t Was toch best een aorig jong. Mit mooie broene oog’n en mooi lang en slank en zo? ’t Was best een stuk!
God wat had Iete een spiet. Had ze now niet een beetie toeschietelijker kun’n weez’n?
Maor ’t was ook zo kold ewest daor in die tuun, ze had loop’n ril’n as een rietie. Veul te kold veur de tied van’t jaor. En veul te dun ekleed. Veur ’t feest natuurlijk. Dat stomme schoelfeest, waorveur sie niemand had weet’n te vraog’n.
Ja, meteen had sie an Garriet-Jan edacht. Maor dat had ze niet edurfd. Nee, nee, oh gottegottegot, nee heur. Bej de gedachte allenig al, was ze rood word’n as een biet. Garriet-Jan had heur ien keer thuus bracht, achter op zien brommer. Ze was helemaol hoteldebotel nao zien zoenen, maor hij had heur niet meer zien staon de volgende dag.
Wat mus ze ook op zo’n stomme katholieke schoele mit allenig maar magies. Bej een old klooster en een internaot mit nog meer magies, en gin iene leuke vent. Wie mus ze now mee uut vraogen?
Bertha was de reddende engel ewest. Bertha, een klasgenotie had een tweelingbreur, Herman, en Herman wilde wel mit Iete naor dat feest. Herman was zelfs as een blok veur heur val’n daor op dat feest.
Ze had’n daanst, ze was uut heur dak egaon op Cuby and the Blizzards. Sie had’n best wel lol emaokt.
Toen wilde Herman naor buut’n. Wandel’n in de kloostertuun.
De aosem kwaam as daampe uut hun mond’n, zo kold was’t. Het grind knirpte onder de voet’n. Nevel hing as witte wiev’n over de perk’n en over t’grös. Smalle paadies slingerd’n deur de romantische tuun, waor ze saom’n in wandeld’n. En Herman was romantisch word’n, veuls te romantisch en te klef.
Hij wol veuls te veul. Zien mond was te gretig en zien haand’n te graaierig toen ze op ’n baankie zaat’n.
Iete rilde in heur dunne bloesie. Hij had het oop’n knoopt en zit’n staor’n naor heur volle grote borst’n. Het blanke vlees leek nog witter deur de maon, die half deur de nevels scheen.
Zien grote haand’n op heur rugge, op zoek naor de sluting van de busteholder, waor’n heet ondanks de kolde.
‘Oh, Iete, wat bin ie mooi’ hijgde hij in heur nekke. ‘Iete wat hej een mooie tiet’n, ik wil ze zien, oh, trek toch asjeblieft oen beehaa uut!’
‘Bin ie helemaol gek word’n, ’t is ja veuls te kold man, ik zit te ril’n van de kolde.’
Ze duwde ‘m resoluut van zich af, ‘t was mooi ewest, ze kon’t niet,’t was Garriet-Jan die in heur kop zat, der was gien plek veur Herman, der was gien plek veur niemand niet. Allenig plek veur Garriet-Jan, de bink van’t dörp. Wat had ze een hekel an zich zelf. Ze knoopte heur bloesie dicht en liep vastberaod’n weer naor ’t feest.
En now hef ze zo’n spiet. Had Bertha t’dan maor zegd, dan had ze nog wel misschien..., allenig vanwege die stomme Garriet-Jan, die heur toch niet ziet staon, die vast wel mit aandere magies an’t rotzooi’n is… Maor ze had ’t niet kunt met Herman. Niet as ze niks vuult, ook al was’t een lekker ding west, die Herman.
Traon’n biggel’n over heur wang’n, over heur blozende bolle wang’n, die glim’n in t’zunnechie dat deur de hoge olde boom’n schient. Een waos van groene kleur’n, helder en fris.
’t Is een veuls te mooie lentedag, het is niet eerlijk, oh, ze hef zo’n spiet, as ze al die aandere mens’n ziet huul’n, en zien moeder, en Bertha. Now kan ie nooit meer blote borsten zien. As ze t’now maor weten had, dat van die hartkwaol, dat ie een slecht hart had, op zien achttiende jaor al, da’s toch niet normaol, hoe had ze dat now moet’n weet’n?
‘Broeders en zusters, een jong leven begeleiden wij hier naar de laatste rustplaats, wij vragen God om mededogen voor allen die achterblijven. Mag ik u verzoeken...’ De pastoor döt een stap an de kaante.
Iete werpt as iene van de laotst’n snikkend een scheppie zaand in’t graf.
‘Ut Spiet me zo, Herman’ fluustert ze, terwijl het zaand zachies op de kiste roffelt, ‘as ik t’weet’n had, had ie ze moog’n zien, echt waor,’t spiet me!’
Marjolein Koetsier, Oktober 2007